XIX асрнинг иккинчи ярмидан бошланган рус босқинида, ХХ аср биринчи ярмидаги қатлиомларда шаҳид кетган 1 000 000 ватандошларимиз, 1937-1953 йилларда қатағонга учраган 100 000, шундан отиб ташланган 13 000, Иккинчи жаҳон урушида қурбон бўлган 500 000, 1980 йиллардаги “Пахта иши”да жувонмарг кетган 10 000 лаб, Мустақиллик даврида Ватан ва Ҳақ учун жонини берган минглаб юртдошларимиз…
Барчаларини эслаймиз ва қадрлаймиз! Ватан, халқ ва Ҳақ учун хизмат қилиб жон берган барча фидойилардан Аллоҳ рози бўлсин!
Эслатиб ўтаман: 9 май Ўзбекистонда расман Хотира ва Қадрлаш куни деб эълон қилинган. Бу кун Георгий латтасини кўкракка қадаб, тантана қилиб, Ғалаба салюти отиладиган кун эмас. Бу кун мамлакатимиз озодлиги ва мустақиллиги учун жон берган Ўзбекистоннинг барча ўғлон ва қизлари хотираси кунидир.
Кўзингизни очинг: бугун кўкрагингизга боғланган йўл-йўл латта эртага кўзингизга боғланади. Бугун қуйироқда кўтарилган қизил байроқ эртага қалбингизга осилади. Кўзи кўр, қалби сўқир миллат бўлишдан асрасин!